Тус сумын ЕБС нь 1951 онд Хэнтий аймгийн Биндэр сумын баруун хойд хэсэгт орших Онон, Барх, Хурхын голын хөвөөгөөр амьдардаг нутгийн иргэдийн хүсэлтийн дагуу аймгийн гэгээрлийн хэлтсийн шийдвэрийг үндэслэн “Эгийн голын бага сургууль” нэртэйгээр анх байгуулагдсан. АБТА ахмад багш Г. Буджав агсаны удирдлаган дор 4 багш, 4 анги, 2 ажилчин болон нийт 50 сурагчтай сургалт хүмүүжлийн үйл ажиллагааг эхлүүлж байсан байна. Хожим нь 1966 онд Хэнтий аймгийн АДХГЗ-ны шийдвэрээр найман жилийн сургууль болон өргөжиж суурь боловсрол олгодог болсон. /12 бүлэг, 200 гаруй сурагч, 20-иод багштай./ Анхны 8-р анги нь 1969 онд Дамдинсүрэн багшийн удирдлаган дор төгссөн бөгөөд төгсөгчид нь Элбэгдоржийн Элдэв-Очир, Долгорын Сүх-Очир, Чимидцэрэнгийн ГанӨлзий, Нацагдоржийн Дуламсүрэн нар байв. Мөн 1993, 1998 онуудад 2 удаа 10 дугаар анги төгсгөж, 50 гаруй хүүхдэд бүрэн дунд боловсрол олгосон байна. Тус сургууль нь 2000 оны 05 дугаар сарын 31-ний өдрийн Монгол улсын Засгийн Газрын тогтоолоор төрийн соёрхолт яруу найрагч Нямбуугийн Нямдоржийн нэрэмжит сургууль болж, байгуулагдсанаас хойш эдүгээг хүртэл 54 төгсөлт хийн эрдэм боловсролыг түгээсээр байгаа болно. Өнөөдрийн байдлаар тус байгууллага нь 422 орчим суралцагч, 38 багш, ажилтантай сургалт хүмүүжлийн үйл ажиллагааг зохион байгуулан явуулж байгаа бөгөөд мэргэжлийн багшлах боловсон хүчнээр бүрэн хангагдсан. 2017 онд 320 хүүхдийн суудал бүхий хичээлийн шинэ байр ашиглалтанд орсон. Нийт 14 бүлэгтэй. Дотуур байранд 40 орчим хүүхэд амьдардаг. Багш нарын 70% нь тэргүүлэх, заах аргач мэргэжлийн зэрэгтэй. Анги дүүргэлтийн дундаж хэмжээ 30. Сүүлийн жилүүдэд нэлээд хөрөнгө оруулалт хийгдэж, сурагчдын сурч боловсрох орчин нөхцөл харьцангуй сайжрахын хамт цаашид сургалтын чанарыг сайжруулах, сурагчдын авьяас чадварыг хөгжүүлэх, сургалтын орчин нөхцлийг сайжруулах чиглэлээр “Сургуулийн стратеги хөтөлбөр”-ийг боловсруулж, түүнд нийцүүлэн олон зорилтуудыг дэвшүүлэн ажиллаж байна. Энэ нь тодорхой үр дүнд хүрч байгааг энд хэлэх нь зүйтэй. Сурагчдын дунд шатар, гар бөмбөг, математик, гар урлал, уран зураг, үндэсний хөгжим, дуу гэх мэт 10 гаруй төрлийн дугуйлан, секц хичээллүүлэн улс, аймаг, орон нутгийн чанартай уралдаан тэмцээнүүдэд амжилттай оролцож, олон арван медалиар энгэрээ мялааж сургуулийн түүхийн хуудсыг нэмэгдүүлсээр байна.